22. augustā plkst.16.00 nūtiks Jēkaba Slišāna karikaturu izstuodis “UpītieDzeiveJauka” atkluošona. Itei byus pyrmuo juo izstuode Bolvūs, i tū byus vareiba apsaviert da 16. septembra.

Jēkabs Slišāns ir dzims 2010. goda 24. maijā Reigā, kuo videjīs bārns Ligitas Spridzānes i Andra Slišāna pīcu bārnu saimie. Suokūt ar 2011. goda rudeni dzeivoj Upītie. Kūpš mozuom dīnuom jam ir patics zemuot. Juo dūmu bīdrs ir bejs vacuokī bruoļs Domeniks, ar kuru zeimojūt, plastelinā veidojūt i nu kura īdvesmojūtīs ari suocs zeimuot karikaturas. Pādejā laikā vusuvaira zeimoj cylvākus, portretus i karikaturu. 2020. goda nūgalie pyrma Zimassvātku jam beja apsaņimšona nu 19. oktobra leidz 25. decembram uzzeimiet vīnu portretu-karikaturu kotru dīnu i pīrakstiet dīnas lobūs dorbus i tuo tapa karikaturu izstuode, kas tyka izlykta Ontona Slišāna Upītes kultūrviestures muzejā, Jēkabs Slišāns “Karikaturas”. Jēkabs pyrmū klasi pabeidz Upītes pamatškolā, piec školas sliegšonas turpynoj muocietī Baļtinovas vydškolā.

2022. godie jis pabeidza Baļtinovas MMS muokslas klasi i kuo diplomdorbu jis zeimeja karikaturas “UpītieDzeiveJauka”. Tys ir nabeidzamīs stuosts par juo saimi: vaciku Ontonu Slišānu, babu Irēnu Slišāni, tātu Andri Slišānu, tātas muosuom Anneli, Lienīti un Mārīti Slišāniem i jūs saimem, mammu Ligitu Spridzāni, paša muosuom i bruolim Kati, Domeniku, Helēnu, Miķeli Slišānim i jū pašu - Jēkabu Slišānu. Jēkabs ir ilustrejs Folkloras kūpas “Upīte” veiru dzīsmu disku “Padzīdam i…”. Jēkaba 6 zeimejumi ir Ontona Slišāna bārnu dzejūļu kūpkruojumā “Vuss apleik maņ munā volūdā skaņ”.